【自己功課自己做 – Revisit Tesla】

其實自己有一段時間無Update Tesla基本面，本身唔係特別中意Elon Baby，覺得佢係癡線佬，將晶片作為主戰場的我，偶像當然是張忠謀。記得大概兩年前做過個節目，自己覺得Tesla毛利太低，都係造車。無可否認，當年估值的確有點過火，但今日再睇多次，Tesla實在發展緊，又有機會 / 已經盈利緊嘅項目有啲咩？

Tes L 有好多，我是一個滿腦子電晶體嘅人，有咩冤枉左Elon BB請更正。

車 / Robotaxi / FSD

賣車就無乜特別好講了，大家睇住個銷售數據就OK。佢賣左咁耐車，我仲要逐個車型係呢度拆出黎計數都無意思。賣多賣少Tesla股價都會有一個非常高嘅Premium，所以個價值唔係賣幾多車，而係如果Robotaxi  & FSD （Full Self Driving）係更多美國省份批到出黎，甚至將來商業化，可以帶動幾多Sales？

以Elon BB而家做左Trump Trump頭馬黎講，紅色嘅State要批Robotaxi易如反掌，都係大勢所趨，但有幾個問題而家仍然懸而未決。

自動駕駛技術是否真正成熟？筆者經常有問題嘅係，究竟自動駕駛係咪可以完全用視覺感應器就搞掂所有問題？人眼嘅感官細胞比鏡頭敏銳N倍，曝光超快，都無需要對焦就即刻可以遠近都睇到，但鏡頭唔得。

Elon BB強調自己無需要用LiDar（激光雷達）就可以解決呢個問題，佢而家係用多個鏡頭去感應唔同嘅距離，可以解決部分問題，但總有盲點。對焦需時，撞到埋去先對焦就蚊訓。所以究竟最後FSD係咪可以完全做到Level 5 自動駕駛仍然好多變數。

隔離鋪Google嘅Waymo就一早已經用曬LiDar、鏡頭、鐳射測距機，成本係貴，但無呢個問題。而家係Phoenix、Arizona、LA、San Francisco已經有試點玩緊。Google將會係Elon最大競爭對手。

如果呢個問題解決，Tesla每年賣多十萬八萬部車，輕輕鬆鬆。

儲能

睇翻收入Breakdown，儲能基數非常細，但增速好快，乜料？

簡單講，就係一個超巨型尿袋。朝早個個開電腦開冷氣，用電量超高，電廠負荷唔到，就搵個尿袋幫手頂住。夜晚用電量低就將多餘嘅電力儲起。

以前儲能超級貴，因為要搵個水壩，用高低差，抽水/排洪黎儲能。但而家因為有鋰電池，碳酸鋰個價都由高位跌咗七成，所以用鋰電池嚟儲能嘅效益高咗好多。呢個係大勢所趨，雖然基數細但係嗰張長速度會繼續幾快下。

個人魅力，同埋其他嘢

連半導體大佬皮褸黃都話Elon BB係超人，講真你又真係冇辦法唔佩服佢execution嘅能力。唔好講話做車同埋自動駕駛領先時代，淨係講低軌衛星同上太空，呢個年代都冇乜人可以及得上佢。依家仲要入埋政府做嘢，佢都可以話係呢一個時代嘅Tony Stark。

成間tesla嘅估值，就算你當自動駕駛同埋robotaxi完全商業化，再推高啲儲能業務個增長，你點都會覺得貴到痴線。所以我覺得而家100倍pe，有一半係畀咗佢個人格魅力。呢間係咪一間好公司，就係決定喺你信唔信佢。

小小總結，我點都有個分析員底喺度，人格魅力呢家嘢我真係量化唔到。人只能賺自己認知範圍內嘅錢，既然睇唔明，咁就唔好買。但係都冇需要話佢係騙局，就算睇淡，都唔一定要做淡。

《南華金融集團研究部副總監　莫灝楠》