【自己功课自己做 – Revisit Tesla】

其实自己有一段时间无Update Tesla基本面，本身唔系特别中意Elon Baby，觉得佢系痴线佬，将芯片作为主战场的我，偶像当然是张忠谋。记得大概两年前做过个节目，自己觉得Tesla毛利太低，都系造车。无可否认，当年估值的确有点过火，但今日再睇多次，Tesla实在发展紧，又有机会 / 已经盈利紧嘅项目有啲咩？

Tes L 有好多，我是一个满脑子晶体管嘅人，有咩冤枉左Elon BB请更正。

车 / Robotaxi / FSD

卖车就无乜特别好讲了，大家睇住个销售数据就OK。佢卖左咁耐车，我仲要逐个车型系呢度拆出黎计数都无意思。卖多卖少Tesla股价都会有一个非常高嘅Premium，所以个价值唔系卖几多车，而系如果Robotaxi  & FSD （Full Self Driving）系更多美国省份批到出黎，甚至将来商业化，可以带动几多Sales？

以Elon BB而家做左Trump Trump头马黎讲，红色嘅State要批Robotaxi易如反掌，都系大势所趋，但有几个问题而家仍然悬而未决。

自动驾驶技术是否真正成熟？笔者经常有问题嘅系，究竟自动驾驶系咪可以完全用视觉传感器就搞掂所有问题？人眼嘅感官细胞比镜头敏锐N倍，曝光超快，都无需要对焦就即刻可以远近都睇到，但镜头唔得。

Elon BB强调自己无需要用LiDar（激光雷达）就可以解决呢个问题，佢而家系用多个镜头去感应唔同嘅距离，可以解决部分问题，但总有盲点。对焦需时，撞到埋去先对焦就蚊训。所以究竟最后FSD系咪可以完全做到Level 5 自动驾驶仍然好多变量。

隔离铺Google嘅Waymo就一早已经用晒LiDar、镜头、激光测距机，成本系贵，但无呢个问题。而家系Phoenix、Arizona、LA、San Francisco已经有试点玩紧。Google将会系Elon最大竞争对手。

如果呢个问题解决，Tesla每年卖多十万八万部车，轻轻松松。

储能

睇翻收入Breakdown，储能基数非常细，但增速好快，乜料？

简单讲，就系一个超巨型尿袋。朝早个个开计算机开冷气，用电量超高，电厂负荷唔到，就搵个尿袋帮手顶住。夜晚用电量低就将多余嘅电力储起。

以前储能超级贵，因为要搵个水坝，用高低差，抽水/排洪黎储能。但而家因为有锂电池，碳酸锂个价都由高位跌咗七成，所以用锂电池嚟储能嘅效益高咗好多。呢个系大势所趋，虽然基数细但系嗰张长速度会继续几快下。

个人魅力，同埋其他嘢

连半导体大佬皮褛黄都话Elon BB系超人，讲真你又真系冇办法唔佩服佢execution嘅能力。唔好讲话做车同埋自动驾驶领先时代，净系讲低轨卫星同上太空，呢个年代都冇乜人可以及得上佢。依家仲要入埋政府做嘢，佢都可以话系呢一个时代嘅Tony Stark。

成间tesla嘅估值，就算你当自动驾驶同埋robotaxi完全商业化，再推高啲储能业务个增长，你点都会觉得贵到痴线。所以我觉得而家100倍pe，有一半系畀咗佢个人格魅力。呢间系咪一间好公司，就系决定喺你信唔信佢。

小小总结，我点都有个分析员底喺度，人格魅力呢家嘢我真系量化唔到。人只能赚自己认知范围内嘅钱，既然睇唔明，咁就唔好买。但系都冇需要话佢系骗局，就算睇淡，都唔一定要做淡。

《南华金融集团研究部副总监　莫灏楠》