筆者放假期間偶然路過觀塘，平時餐廳都滿人，但今日假期入座率竟然僅僅得6成左右。感覺商場人流都比平日少接近一半。

早前筆者曾經撰文“水往低處流”，北上消費趨勢一旦形成，則洛澤不絕。除非香港消費開始重現性價比，否則短期內難以逆轉。香港地產扼殺創意，透支經濟潛力。假設買串魚蛋15蚊，隨時有7 / 8蚊係攞黎交租。一河之隔，樓上深圳一串魚蛋可能3 / 4蚊搞掂，咁比你都上去食。

買物業係睇回報，高租金殺曬啲商戶，無租金收入，業主需要減租吸租客，物業投資者都會因為收益率太低走貨，物業都會跌。

但呢個過程會非常漫長，你都要等啲所謂有實力，但其實係反應慢，而家都未覺得個市出問題嘅業主肯止蝕，“打埋最後一口貨”出黎，個市先會慢慢好翻。到時個物業價格同個租金變翻正常，大家先開始會開始覺得唔痛。

如果你覺得香港地產市場而家有投資價值嘅，大可跟啲樓市博士、專家，買樓買鋪收租。可能過幾年回首一望，原來Casper摸底唱淡香港樓市。屆時歡迎大家笑我。如果樓市起死回生，我都好想比大家笑。

筆者見到香港咁都當然係唔開心，但呢件事唔會係你上FB開個結業關注組，呼籲大家留港消費就可以阻止嘅。長痛不如短痛，趕快跌完比而家拖泥帶水好。地產市場回歸理性，市場翻去所謂嘅equilibrium，香港才能重新出發。如果收入下降，甚至份工都危危乎，仲要因為所謂嘅一份責任而係香港捱貴貨，食貴野，你只係同自己荷包作對。

呢個可以話係一個“共業”，而不是詛咒為虐，趨勢似乎不可逆轉，做自己便可。