笔者放假期间偶然路过观塘，平时餐厅都满人，但今日假期入座率竟然仅仅得6成左右。感觉商场人流都比平日少接近一半。

早前笔者曾经撰文“水往低处流”，北上消费趋势一旦形成，则洛泽不绝。除非香港消费开始重现性价比，否则短期内难以逆转。香港地产扼杀创意，透支经济潜力。假设买串鱼蛋15蚊，随时有7 / 8蚊係攞黎交租。一河之隔，楼上深圳一串鱼蛋可能3 / 4蚊搞掂，咁比你都上去食。

买物业係睇回报，高租金杀晒啲商户，无租金收入，业主需要减租吸租客，物业投资者都会因为收益率太低走货，物业都会跌。

但呢个过程会非常漫长，你都要等啲所谓有实力，但其实係反应慢，而家都未觉得个市出问题嘅业主肯止蚀，“打埋最后一口货”出黎，个市先会慢慢好翻。到时个物业价格同个租金变翻正常，大家先开始会开始觉得唔痛。

如果你觉得香港地产市场而家有投资价值嘅，大可跟啲楼市博士、专家，买楼买铺收租。可能过几年回首一望，原来Casper摸底唱淡香港楼市。届时欢迎大家笑我。如果楼市起死回生，我都好想比大家笑。

笔者见到香港咁都当然係唔开心，但呢件事唔会係你上FB开个结业关注组，呼吁大家留港消费就可以阻止嘅。长痛不如短痛，赶快跌完比而家拖泥带水好。地产市场回归理性，市场翻去所谓嘅equilibrium，香港才能重新出发。如果收入下降，甚至份工都危危乎，仲要因为所谓嘅一份责任而係香港捱贵货，食贵野，你只係同自己荷包作对。

呢个可以话係一个“共业”，而不是诅咒为虐，趋势似乎不可逆转，做自己便可。